Quelltext vun der Säit Beaconsfield weisen

'''Beaconsfield''' ass eng Stad (''[[Market town]]'') am [[England|englesche]] [[Buckinghamshire]].

Beaconsfield huet een alen (''Old Town'') an een neien (''New Town'') Deel. Deen alen Deel ass am [[18. Joerhonnert]] rondërem d'[[Postkutsch]]estrooss gewuess. Typesch englesch: am ''Old Town'' gëtt et aacht [[Pub]]s, woubäi ee muss bedenken, datt am ganzen Duerf 11.000 Leit wunnen.

== Geographie ==

Beaconsfield läit nëmme 25 [[Meil]]en (zirka 37 [[Kilometer|km]]) vu [[London]] ewech. Den [[Heathrow Airport]] ass knapps 15 Minutte mam Auto wäit ewech, a mam Zuch brauch een net méi wéi 35 Minutte fir an den Zentrum vu London ze fueren.

== Geschicht ==

Et gëtt ugeholl datt d'Duerf vun de [[Sachsen|Sachse]] gegrënnt gouf, eng hëlze Kierch stoung do, wou ëm [[900]] n. Chr. déi aktuell Kierch gebaut gouf. Warscheinlech ass dëse Site gewielt ginn, wëll hien op hallwem Wee tëscht London an [[Oxford]] läit, wat mat der Zäit ëmmer méi wichteg ginn ass.
Déi éischt Kéier schrëftlech ernimmt gëtt Beaconsfield am Joer [[1185]], deemools gëtt et nach ''Bekenesfeld'' geschriwwen.

Am [[13. Joerhonnert]] ass de [[Richard, Earl of Cornwall]] den Herrscher vum ganze Landstreech ginn. Hie war dem Kinnek [[Henry III. vun England|Henry III.]] säi Brudder, net verwonnerlech also datt hien [[1255]] déi kinneklech Autorisatioun krut fir all Woch e Maart ofzehalen. Dëse Maart ass zwar am fréien [[19. Joerhonnert]] ofgeschaaft ginn, mä zanter [[1982]] gëtt et en nees.
Am Joer [[1266]] ass d'Duerf dem Klouschter vu [[Burnham]] zougeschwat ginn, wat dësem beträchtlech Geldzommen erabruecht huet.

Dat [[18. Joerhonnert]] war eng Ära vu Prospéritéit, zum gréissten Deel duerch Leit, déi op der Duerchrees waren an déi op hirem Wee mat der Postkutsch tëscht London an Oxford ëmmer méi dacks am Duerf iwwernuecht hunn. Stroosseraiber (''Highwaymen'' fir den Englänner) hunn dat och zimmlech interessant fonnt an [[Holtspur Hill]] war zum Beispill eng vun de beléiftste Plaze fir Leit ze plëmmen.
 
Mëtt [[19. Joerhonnert]] koum dunn awer d'Enn vun der Prospéritéit, d'[[Agrikultur]] ass ëmmer manner rentabel ginn an den [[Zuch]] huet d'Postkutsch vum Marché verdrängt. Bis [[1906]] ass et keng Zuchverbindung mat Beaconsfield ginn, aus [[Geographie|geographesche]] Grënn.

D'Gare vu Beaconsfield war gutt 1,5&nbsp;km nërdlech vum Duerf, mä si ass séier den Zentrum vum Neiduerf ginn. Haut wunnen a ganz Beaconsfield iwwer 11.000 Leit. Den ale Kär ass mëttlerweil eng ''Conservation Area'', e steet also gewëssermoossen ënner Denkmalschutz. Alles wat nei bäikënnt, gëtt am Neiduerf gebaut.

== Kuckeswäertes ==
* [[Bekonscot Model Village]], ee Miniatur-[[Diorama]] vum engleschen Duerfliewen.

== Dichteg Leit vun do ==
* [[Terry Pratchett]]

== Jumelage ==
* [[Langres]], [[Frankräich]]
== Um Spaweck ==
* [https://web.archive.org/web/20050111085838/http://www.beaconsfield.co.uk/ Beaconsfield]
* [http://www.bekonscot.com/ Bekonscot]
{{Commonscat}}

[[Kategorie:Stied an England]]