انتخاب: منیب الرحمن
ماخذ: کلیات حبہ خاتون مرتب امین کامل

میہ چھیہ حبہ خاتون نہِ کلامک انتخاب پیش کرنس منز حدہ روٚس خوشی۔ سورے انتخاب ٹایپ کٔرتھ پیش کرنہ بجایہ روزہ بہ یتھ انتخابس ہُریر کران۔ انشااللہ ییہ ریتس کھنڈس تام سورے انتخاب پیش کرنہ۔ سیتی ییس لفظن ہند معنی تہ تمن ہند پھور تہِ دنہ۔ امہ علاوہ ییہ سورے انتخاب پیش کرنہ پتہ، کلامک جایزہ ہینہ۔ یتین یتین ضروری آسہِ کلامس ییہ تصحیح تہِ کرنہ۔

کلامک پروف چھہ نہ ونہ پرنہ آمت۔

1
گاہ چون پیوان گٹہِ
اکہِ لٹہِ ییہم نا

یاون میانہِ قرمز پٹہِ
کمیو وانہ رنگنے آکھ
میہ نو زون أتھر ژٹہِ
اکہِ لٹہِ ییہم نا

آبس بہ مٔژھس گٹہِ
نو٘ٹ مو٘ٹھمو یارہ بل
وزرِ واوہ نو٘ٹ ما پھٹہِ
اکہِ لٹہِ ییہم نا

حورہ لٲل درایس گٹہِ
ژورہ باے پیومو ناو
سۅنہ کن تہ لٔدر ہٹہِ
اکہِ لٹہِ ییہم نا

یار میون چھہ جمالٹہِ
کمال تس چھم ناو
سہ چھم تتہِ بہ کس مٹہِ
اکہِ لٹہِ ییہم نا

یار ییلہ یارز ژٹہِ
محبت نہ روزان سور
یارہ دادِ وٲنج پھٹہِ
اکہِ لٹہِ ییہم نا
___

2
دل نِتھ رٹۍ تھم گوشے
وۅلو میانہِ پوشے مدنو

وۅلہ ویسۍ گژھہ وے ہندے
لانیُن نیاے کتہِ اندے
لکہ متۍ کڈنس رندے
وۅلو میانہِ پوشے مدنو

وۅلہ ویسۍ گژھہ وے ببرے
چھۅکھ میہ لوینم تبرے
کانژھا سوزنم نہ خبرے
وۅلو میانہِ پوشے مدنو

وۅلہ ویسۍ گژھہ وے شادۍ پور
واینہِ ترادس ہٲنز ژور
سیندِ وانہِ جھلہ سے اتھہ کھور
وۅلو میانہِ پوشے مدنو

وۅلہ ویسۍ گژھہ وے ہی یے
یُس مرِ سہ کتہِ یی یے
پراران چھیس چانہِ زی یے
وۅلو میانہِ پوشے مدنو

وۅلہ ویسۍ گژھہ وے کریژھے
لکہ متۍ تجنس ریژھے
تمن تے میون ہیو گژھے
وۅلو میانہِ پوشے مدنو

وۅلہ ویسۍ گژھہ وے ون تے
لوکو برۍ ہس کن تے
تی بوز تمۍ سادن تے
وۅلو میانہِ پوشے مدنو
___

3
ہنہِ لو ہنہِ لو ہنہِ لو
بال گجس مُہنہِ لو

سمبال کٔرتھ گرِ بال درایس
جمال چون وچھنہِ لو
خمارہ ہتۍ یارہ سندۍ کونکل
شہمار زن بوچھنہِ لو

اس مے ویسۍ یے میون ہیو کس گو٘و
تنہِ گٲمژ چھم گنہِ لو
باز نے ییم بزگار کٔرنس
مازہ نش وستخوان چھنہِ لو

تس مو گٔژھن تس نش جدٲے
یس یُس دلس سنہِ لو
تس پتہ رٲوِم ریتھ سال دۅہ راتھ
ژیتھ یار لوگم رٲسنہِ لو

بہ بال درایس زیٹھنہِ ریتے
تس کُس شیچھ واتنہِ لو
اسہِ کن ییہ نے تھکہ پور لوچرن
اکہ اکہ گلزار تنہِ لو

زوک زودان یورۍ کن پھیرِ نا
زوِ یام رودم کامنہِ لو
اسہِ اوس خاطر اچھ سانہِ وچھہن
مچھ کیا گٔیس میانۍ منہِ لو

سہ لیے ییہ نا یاونن بہار
پھلیا لج میانہِ تنہ لو
حبہ خوتونے پد ونۍ پانہ تس
مدننہِ منہِ کامنہِ لو
___

4

آلوہ چانے بہ دو بلہ
لالو کلہ آلوہ وے

کھیتو دۅدہ بتہ بییہ الہ
چیتو پیالہ پیا پے
کریو آرولن مالہ (1)
لالو کلہ آلوہ وے

دۅدہ ہرہ رۅپہ تنہِ ملہ
میہ چانۍ کل گنییم
ژندن وانہِ بہ تن چھلہ
لالو کلہ آلوہ وے

بالس زون لجس ژھلہ
ژیہ کتہ زولہ گمژ چھے
برونزا چھیس تہ پتو ڈلہ
لالو کلہ آلوہ وے

طوطس بیور زاگان ژھلہ (2)
میہ تس پان پُشرمے
موتس نش کوتو ژلہ
لالو کلہ آلوہ وے

خوف ہیتھ گرِ کوتو دراکھ (3)
خۅفتن کونہ گزاریوتھ
حبہ خوتونہ وۆنے بلہ (4)
لالو کلہ آلوہ وے

(1) مالہ چھہ نہ قافیس سیتی رلان
(2) طوطس بیور رٹان ژھلہ (روایت)
(3) اتھ مصرعس چھہ نہ قافیہ رلان
(4) ییتہ نس کیا چھہ بلہ لفظک معنی