مسرور امین

سانۍ یہ موج کشیر چھیہ پننہ خوبصورتی کنۍ تمام عالمس منز مشہور ییمک رنگہ رنگہ حسن وچھتھ چھہ انسانس روحانی کیو قلبی سکون میلان. بقول عرفی شیرازی

ہر سوختہ جانی کہ بہ کشمیر درآید
گر مرغِ کباب است کہ با بال و پرآید

خوبصورتی علاوہ چھیہ کشیرِ تمن فقیرن، ریشن، عارفن، ولی ین تہ صوفی بزرگن زنم دیتمت یمن زن آفاقی اہمیت چھیہ تہ یمہِ وجہ سیتۍ یتھ وادی ریشۍ وٲر تہ پیرہ وٲر تہِ ونان چھہِ- چونکہ امہ کاروانک آغاز چھہ لل دیدِ پیٹھہ شروع سپدمت تہ ونہِ تہِ چھہ چلون — ونۍ کین تہِ چھہِ یم گاشہ تارکھ نظرِ گژھان۔ یمو گاشہ تارکو منزہ چھہ غلام رسول قاڑو تہِ اکھ۔

یہند اصلی ناو اوس غلام رسول پارمو، عرف قاڑو۔ یہندس بابہ صابس اوس ناو رحیم پارمو۔ قٲڑۍ صاب ٲسۍ ڈونۍ پاوٕکۍ روزن والۍ۔ ڈونۍ پٲو چھہ اسلام آبادہ پیٹھہ اکھ کلو میٹر دور اچھہ بل سڑکہِ پؠٹھ واقع۔ یہند زا سنہ چھہ 1915ء ماننہ یوان۔ یم چھہِ ۸۵ ؤری وٲنس پرٲوتھ یتھ عالمس رۄخصتھ کٔرتھ ابدی زندگی پٕراوان۔

قٲڑۍ صابس اوس لۄکچارسے منز مالۍ سند سایہ وۆتھمت تہ گرک بار پیوکھ معصوم پھیکن پیٹھ تلن۔ بالیغ گژھتھ کوٚرکھ جانہ دیدِ ناوۍ زنہِ سیتۍ نکاح۔ یمن ٲسۍ ژور اولاد زہ کورِ تہ زہ لڑکہ۔ پیشہ کنۍ ٲسۍ زمیندار مگر خدا صٲبن اوسکھ صفت دیتمت زِ محنت کرتھ ٲسۍ گرہ بار پالان تہ مختلف کار کسبن سیتۍ ٲسۍ تعلق تھاوان۔ یمو چھیہ زمینداری علاوہ پھیرِکٲم، کھانہ کٲم وغیرہ تہِ کرمژ تہ سیتۍ سیتۍ ٲسۍ پنین وۄندہ سیرن تہِ جذبن ہنز باوتھ تہِ کران

میہ نو معلوم بہ چھس غیر زان
بہ کس عاشق گمژ دیوان
میہ حورے چھم یہ للوُن نار
بہ کر ڈیشن پنن جانان

قٲڑۍ صاب ٲسۍ بظاہر ناخواندہ مگر پیر رہبرو ٲسکھ روحانی تربیت کرمژ۔ ظاہری مرشد اوسکھ غلام محمد ریشی عرف عمہ بابہ یم ژارِ شریفکۍ روزن والۍ ٲسۍ- عمہ بابہ ٲسۍ تھدِ پایکۍ فقیر تہ صوفی بزرگ۔ حضرت زین الدین ولی رح سنز ٲسکھ سیٹھاہ یژھ تہ پژھ تہ یمن ٲسۍ پنن باطنی رہبر تسلیم کران یہندس کلامس منز چھہ واریاہن جاین تہند ذکر لبنہ یوان۔

رسلۍ ونۍ عشقہ اسرار
ونتھ کیاہ زانہِ گفتار
زٲنہ متۍ دیتنم ایثار
ونتھ کیاہ زانہِ گفتار

زٲنہ متۍ رسلس یی وۆن
ادہ سیر بازار دراو نۆن
کۆرنس واقف پانہ پننس سیرہ سے
دس میہ دیٚتنم زٲنہ مالۍ دستگیرہ نےٕ

چونکہ قٲڈۍ صاب ٲسۍ ناخواندہ اوہ سبہ ٲسۍ نہ تم لیکھت ہیکان مگر تہندۍ اکۍ طالبن ثناءالللہ میر صابن کۆر تقریبا تہند سورے کلام قلمبند تہ دژنس "جام مے معرفت” ناوۍ کتابی صورتھ۔ یہند واریاہ کلام چھہ ونہِ چھپنے تمیک وجہ چھہ شاید یی زِ ثناءالللہ میر صاب گے رحمتِ حق۔ کلام چھہ ونہِ ثناءالللہ میر صابنس لۄکٹس نیچوس نش موجود۔ قأڈۍ صابس أسۍ زہ چیز عطا آمتۍ کرنہ، فقیری تہ عاشقی- بقولِ ثناءالللہ میر صاب قأڈ صابن گفتہ چھہ زِ تمن آیہ شاعری ہنز کتاب پننس پیرِ کاملہ سندِ اتھہ حضرت شیخ نورالدین ولی رح سندِ آستانہ عالیہ ژارِ شریفٕہ دِنہ۔

ظاہرا باطنچ دِژنے کتاب
یہ چھے جناب پرناویو

قٲڑۍ صابس ٲس کۄکچارہ پانہ پیٹھے صوفیانہ شاعری تہ گیونس کُن لے۔ تم رودۍ ٲخری ایامن تام اتھۍ وتہِ پیٹھ قایم – اکثرو بیشتر ٲسۍ صوفیانہ محفلہ منعقد کران یمن منز تم پانہ شمع بٔنتھ ٲسۍ تابان تہ اندۍ اندۍ ٲسکھ پروانہ گتھ کران۔ یمن محفلن منز اوس اکثر قٲڑۍ صابنے کلام گیونہ یوان یتھ منز زن عشق، لول، فراق تہ وصلہ کین جذبن تہ تجربن ہنز گریکھ جایہ

جایہ نظرِ ٲس گژھان ۔
یارہ دود نارہ کھۄتہ وارہ تۆتیے
دل میون مۆت یے گۆو

میہ لولہ مشکے زالۍ برۍ مے موے خانہ تے
میہ خال وچھ مے زالۍ پنجرس نشانہ تے

رو بہ رو رۄے وچھم للۍ یے
ییٚلے تورے پیوم گاش
مۄے مشکین رۄے چھس پریۆن یے لو
میون معشوق یور ناو نۆنیے لو
اۆن لٲگتھ میہ دژاو وۆنیے لو
میون معشوق یور ناو نۆنیے لو

قٲڑۍ صابن چھہ پننہ شاعری منز تشبیہ، استعارہ تہ علامژن ہند یسلہ پاٹھۍ استعمال کۆرمت یمہ سیتۍ امۍ سنزِ شاعری ہند بجر نظرِ چھہ گژھان۔ سہ چھہ دندن قندہ پھلۍ تہ سینس نازک چینچٕ ؤنتھ اکھ باتصویر کیفیت پیش کران۔ یتھے پاٹھۍ کینہہ، واوو ہوی اصطلاح ورتأوتھ شاعرانہ ہنرمندی ہند باس دوان۔

دند چانۍ قندہ پھلۍ بندہ بندہ لٔلۍ یے
قندہ شربت پورتھ آے
سینہ چون نازک چینچٕ للۍ یے
دینہ ڈولتھ نٲرۍ ون پیو در نار

رسلیو ونتہ کینہہ نہ کتہِ آو
کینہہ نہ نشہِ کینہہ نہ کیاہ نۆن دراو
کینہنک اسرار کینہہ ڈیوٹھم
لا تہ اِلّا اللّہ جمع ڈیوٹھم

معرفت عارفن آوے واوو
واوہ منزہ وحدت دراوو لو