راجہ یوسف

شینس ٲس ککر لجمژ۔ پشن آسہ ششرگانٹہ آویزان۔ غنی جونس کمرس منز اوس اصل وشنیر۔ یمہ سیتۍ دارِ ہندین شیشہ پٹین عیرق اوس وسان ۔ نیبرۍ کنۍ  پییہ تاپہ لٕے کھنڈ تہ غنی جوس گۆو دٲر مژروانک شوق۔ اتھہ سیتۍ دژٲنس دۄگۍ پونشہ مگر دارِ پٹس گٔۍ نہ گرین تہِ۔ پتہ کڈنس زورہ لتھ تہ دارِ پۆٹ آو لبہِ ٹھاسنہ۔ ششر کھنجہ آیہ شیشہ برشیو ہندۍ پاٹھۍ نیبر لاینہ، اجہ آیہ اندرہ کمرس چھکراونہ۔ شاید اوس اندرہ نیبرہ دارِ پٹین تلہ کتر لۆگمت۔ دٲر گیہ یلہ تہ تاپہ وشنیرس سیتۍ آیہ شینہ ژھٹہِ ہندۍ بشتنگ تہِ اورہ۔ ییمہ سیتۍ غنی جوس اچھن وزمل ہش گیہ ۔ توتہِ باسیوس ہوا خوش یوُن ہیو۔ کھوورِ اتھہ سیتۍ دژن دۄشونۍ اچھن مُرنہ زہ ژور۔ أچھ کھوجن تہ ترٲون دور تامتھ نظراہ ۔ اورہ ٲسۍ دور دور تام کنکریٹ تہ پختہ مکانے یوت نظرہ گژھان ۔۔۔ از برونہہ کژتامے وری ییلہ غنی جون یتھ ہاکہ وارِ منز نۆو مکان بنایاو، تمہ ساعتہ اوس یہ سورے علاقہ کلیو کٹیو سیتۍ بٔرتھ ۔۔۔ آنگنہ اپارِکنہ اوس ڈونۍ کلۍ باغ ، پتہ بونہِ باغ ، تہ تمہ پتہ ویرِ وار ۔۔۔ ویرِ وارس سیتۍ سیتی بڈِ بۆڈ دانہِ ڈل۔ یتھ اولہِ سونتے گوڈہ  تیلہ گۄگل ہاکھ ٲسۍ کڈان تہ پتہ لوکھ تیلہ گۄگل پھلیہ ہند مزہ تلان۔ وتہ بیرو پیٹھۍ ٲس زنین کیو مردن ہنز رٔج آسان یم وارین تہ ڈورین نظردنہِ ٲسۍ گژھان۔ لوکٹۍ لوکٹۍ شرۍ ٲسۍ بونہِ باغس منز چرۍ گیُش تلان تہ کورِ آسہ خانہ کترین گندان۔ بڈۍ بڈۍ شرۍ ٲسۍ ڈونۍ کلین گیلہ لٲۍ لٲۍ ڈونۍ چھوکہ دٲۍ کران۔ بجہ بجہ کورِ ہکچہ کران تہ رۆف گیوان۔

غنی جو اوس دارِ ہنگس تھپھ کرتھ خبر کیاہ کیاہ سوچان ، ییلہ گامن منز تہِ لوکو پرانۍ مکانہ کننۍ لاگۍ، دانہِ ڈلن تہ ویرِوارن منز لٲگکھ  نوۍ  مکانہ بناونۍ ۔ اڈیو ژھن زمین جایداد کنۍ کنۍ تہ ژلۍ نوین نوین کالونی ین منز۔ گامہ ملازمن منز گۆو گام ترٲوتھ شہرہ بسنک رجحان عام ۔۔۔ غنی جوس تہِ لوگ پننۍ نیچوۍ عبدالرشیدن شہرہ بسنک نیاے۔ غنی جو رودس بضد تہ عبدالرشیدن کۆر فیصلہ زِ پنن اہل وعیال ہیتھ ژلہِ سہ شہر۔ زنانہِ کۆر غنی جو مجبور نیچوس سیتۍ شہرہ بسنہ خاطرہ۔ غنی جون دژ نہ عبدالرشیدس گامچ جاے کننہ۔ البتہ چھۆلن زمین ذراعت نش اتھہ۔۔۔ آسمان وژھس زن تہ ترٹھ ییلہ گام پنن تراون پیوس۔ تہ گۆو شہرچہ اکس کنکریٹ کالونی ہندس نو بایی دہ فٹہ کمرس منز قید۔ کمرس ٲس اکے دٲر یتھ سیکہ پنجرہ لٲگتھ اوس تہ دارِ نیبرہ کنہِ اوس دیوارک اکھ لۄکٹ ژکل بوزنہ یوان یس دارِ نش فٹہ تارہ دور آسہے۔

گۄڈہ گۄڈہ درایاو غنی جو نیبر کن تہِ مگر کوچہ اوس خالی آسان تہ لرِ لۆر مکانن منز خاموشی، پیٹھہ ییلہ عبدالرشیدن اورہ یور نیرنس ٹھاک کۆرس، سُہ تہ تسنز زنانہ عز دید ٲسۍ نہ پتہ کمرہ منزہ نیران ۔ تم ٲسۍ خیالن کھُر انان تہ شُرک تراوان ، پتہ تمن کھر کاساں کاساں پننہ احساسچہ اۆنگجہ رتہ داۍ کران۔ تم زن ٲسۍ پاٹۍ کیمین ہندۍ پاٹھۍ پننسے زالس ولنہ آمتۍ ۔ غنی جوس ٲس وانجہ دگ لٲرتھ گامژ یۄسہ تمس راتس دۄہس ہشارے ٲس تھاوان۔۔۔ یۆتام وۄنۍ غنی جو اتھ کنکریٹ کمرس منز دم پھٹۍ گژھہِ ہے، تمۍ کۆر دلیرانہ فیصلہ تہ آو گام واپس ژلتھ ۔۔۔ امۍ سنزِ زنانہِ عز دیدِ لۆگ نہ چارے تہ سۄ درایس پتہ پتہ۔

غنی جوس چھیہ اچھن زنتہ ژھانپھ لگان، سہ چھہ اچھن پھش دوان تہ اۆش وتھراوان، یہ اۆش اوس تس واراہ کالہ پیٹھہ اچھن وسان روزان۔ دور تام نظراہ کرتھ پییس تم دۄہ یاد  ییلہ گامہ کھڈ پینچو بونہِ باغس اکہ اندہ پیٹھہ بییس اندس تام لیتر لاجایہ ۔۔۔ بونہِ گۄگرن تہ لنگن لنجن پیٹھ یم گانٹو تہ کاوو ٲلۍ ٲسۍ بناوۍ متۍ، تم آیہ ہیرے بۄن لاینہ ۔ یہنزہ تیرہ آسہ پھمبہ کوجن ہندۍ پاٹھۍ ہوہس منز زنتہ ییران۔ آلین گیکھ چھلہ چھانگر۔ گانٹہ گیہ وپھہِ ژلتھ تہ آسہ آسمانس ہیۆر ہیۆر لمان، زنتہ زمینس وچاپہ بنیل اوس آمت یمۍ سورے درہم برہم اوس کۆرمت ۔ یہ منظر وچھتھ وۆتھ غنی جوس زنتہ اندری ترٹہ بزن۔ تس اوس باسان تس پیۆو از بیہ اکہ پھرِ گرہ تاون۔ سہ تہِ چھہ زن گانٹن سیتی ہوہس منز ہیۆر ہیۆرے لمان، نہ چھیس نرِ آسمانس پلان تہ نہ چھِس کھور زمینس لگان۔۔۔

خبر کیاہ تۆگس بوزن، تمۍ انۍ بونہِ گۄڈس تلہ اکھ لۄکٹ بونہ مور ژٹتھ تہ رُون پننس آنگنس منز۔ گۄڈنکہ دۄہہ تروونس گۄڈس تل دۄدہ لوٹہ تہ پتہ اوسس دۄہدش آب دوان۔۔۔ پتہ ییلہ اتھ نیہ سونتہ بامن دراو غنی جوس باسیوو از زاو تس نیہ نیچو۔۔۔

ہمسایہ مکانہ  پیٹھہ آیہ شینہ ترل وستھ تہ اندۍ پکس گۆو الہ زلہ۔ غنی جوس گیہ تالہِ پیٹھہ کھورن تام ژھٹھ نیرتھ، تمۍ دژ شینہ پشس کن نظر۔ بیاکھ شینہ ترل ٲس وسنس تیار۔ وجِس اوسنہ ٹھہراوے، نلکہ آبکۍ پاٹھۍ اوس ٹانٹہ وسان۔ اکہ تاپہ ژنجہ اۆن سورے شین ویگلاوتھ۔ غنی جو اوس پشن پیٹھ روٹہ گامژن شینہ ترلن مدٲے گنڈتھ وچھان یم تاپہ کہ جوشہ سیتۍ بۄن آسہ گژھان۔ امۍ سنزہ نظرہ تہِ آسہ وسونین شینہ ترلن سیتۍ کھرِ بۄن گژھان۔ بیس اکس شینہ ترلہِ وچھان وچھان ییلہ تمۍ سنز نظر تہِ بۄن گیہ، سۄ گیہ تتھ بونہِ ہندس لنگس کن روٹہ یۄسہ تمۍ پانہ رومژ ٲس۔ بونہِ اوس وۄنۍ واراہ مۄچر کھولمت، لنجو اوسس کاڈ کۆڈمت تہ وسجار لۆبمت ۔۔۔ بونہِ کن وچھتھ اوس غنی جوس رمس رمس وشنیر پھیران۔ ہیرِ بۄنہ تہ لنجہ پتہ لنجہ نظراہ کرتھ پییہ تس اکس لنگس پیٹھ کتھ تام چیزس پیٹھ نظر تہ حیرانگی سان لۆگ اتھ وارہ وچھنہِ ۔ ییلہ نہ پورہ لبنہ آس یہ آو اندرہ ہکہ نیبر نیرتھ  تہ دوران دوران ووت بونہِ گۄڈس تل۔ بونہِ لنجو اوس گنیر تہ وسجار لۆبمت توے اوس نہ بونہِ تل کنہ شینہ رژھ تہ پیمژ۔ زمین ٲس سارے خشک۔ غنی جونہِ أچھ آسہ بونہِ لنجن منز کیہتام ژھاران تہ ٲخرس لۆبن سہ چیز یمہ خاطرہ یہ اندرہ دوان دوان نیرتھ آیاو۔۔۔ غنی جون ؤچھ اکھ گانٹھ کینہہ ترشہ، کاغذ تہ کاٹھہ کانہِ بونہِ ہندس دُکھمبۍ لس منز ترتیب سان تھاوان۔ دراصل ٲس سۄ اوول بناوان۔ غنی جوس پھیر رمس رمس مسرت تہ بتھہ پیٹھہ آسس نارہ چپٲژ وۄتھان۔ کیہتام خیال یتھ دژ امۍ پننس اندۍ پکس نظر، اتہ اوس ژۄپاسے شینے شین۔ یہ ژاو دوران دوران گرہ واپس تہ اورہ آو بییہ سیتی نیبر نیرتھ ۔ اتھس منز آسس لسجہ ہرِ تارہ تہ بییہ مکھہ تبر۔ مکھہ تبرِ سیتۍ ٹٔکراوین لسجہ ہرِ تہ تراوین بونہ اندۍ اندۍ دور تامتھ چھکراوتھ۔ پانہ بیوٹھ گرِ اندرہ کنہِ دارِ لۄکٹ لٕے بنٲوتھ بونہِ کن مدٲے گنڈتھ۔ دل اوسس شاد تہ دلچہ تتھ دگہ باسییس فرق یۄسہ تنہ پیٹھہ اگادِ ٲسس گامژ ییلہ عبدالرشیدن گرہ تراونٲوتھ  شہر واجاو تہ تھایان تتھ نو بایی دہ  کنکریٹ کمرس منز قید کرتھ۔